រាជធានីភ្នំពេញ៖ ក្រសួងអប់រំ យុវជន និងកីឡា ក្រុមហ៊ុន Meta និងអង្គការ ខេប បានសហការគ្នាដើម្បីសម្ពោធដាក់ឱ្យប្រើប្រាស់ជាផ្លូវការ ឯកសារបណ្តុះបណ្តាលអក្ខរកម្មឌីជីថលខ្មែរ (KDLP) សម្រាប់ប្រើប្រាស់នៅសាលារៀនជំនាន់ថ្មី ដែលពិធីនេះបានប្រព្រឹត្តទៅក្រោមអធិបតីភាព លោកជំទាវ គឹម សេដ្ឋានី រដ្ឋលេខាធិការប្រចាំ ក្រសួងអប់រំ យុវជន និងកីឡា។
ឆ្លៀតក្នុងឱកាសនោះ លោកជំទាវរដ្ឋលេខាធិការប្រចាំការ បានលើកឡើងថា ក្នុងរាជរដ្ឋាភិបាលនីតិកាលទី៧ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត វិស័យអប់រំត្រូវបានចាត់ទុកជាវិស័យអាទិភាពមួយ ក្នុងចំណោមកំណែទម្រង់សំខាន់ៗរបស់រាជរដ្ឋាភិបាលកម្ពុជា។ លោកជំទាវ បានវាយតម្លៃខ្ពស់ កោតសរសើរ និងអបអរសាទរចំពោះ ក្រុមការងារក្រោមការគាំទ្រដោយក្រុមហ៊ុន មេតា ដែលសម្រេចបានការងារ និងឈានដល់ការសម្ពោធដាក់ឱ្យប្រើប្រាស់ជាផ្លូវការ ឯកសារបណ្តុះបណ្តាលអក្ខរកម្មឌីជីថលខ្មែរនេះឡើង ដែលជាផ្នែកមួយក្នុងការលើកកម្ពស់ការអប់រំឌីជីថលនៅកម្ពុជា។
បន្ថែមលើនោះ លោក សៅ វណ្ណា នាយកប្រតិបត្តិអង្គការខេប ក៏បានថ្លែងអំណរគុណ ចំពោះកិច្ចខិតខំប្រឹងប្រែង ការរួមសហការគ្នារបស់ក្រុមការងារបច្ចេកទេសរបស់គម្រោង និងលោកគ្រូអ្នកគ្រូ មកពីសាលារៀនជំនាន់ថ្មីទាំង៦។ ក្នុងសម័យកាលបដិវត្តន៍ឧស្សាហកម្ម៤.០នេះ ការប្រើប្រាស់បច្ចេកវិទ្យាICT និងឌីជីថលក្នុងការអប់រំ ពិតជាមានសារៈសំខាន់ណាស់សម្រាប់ជម្រុញ និងលើកកម្ពស់ការអប់រំឌីជីថល និងការអប់រំស្ទែម (STEM) ដើម្បីរួមចំណែកយ៉ាងសំខាន់ក្នុងការឆ្លើយតបនឹងគោលនយោបាយ និងទិសដៅនៃសេដ្ឋកិច្ចឌីជីថលកម្ពុជានៅពេលអនាគត។ កន្លងមក អង្គការខេប និងក្រសួងអប់រំ យុវជន និងកីឡាបានសហការគ្នាចងក្រងឯកសារបណ្ដុះបណ្ដាល វិធីសាស្ត្របង្រៀនថ្មីៗមួយចំនួន និងកម្មវិធីសិក្សា(Gaming technologies) ដើម្បីជំរុញការអប់រំតាមបែបឌីជីថល និងការអប់រំបែបស្ទែម(STEM) តាមរយៈគម្រោងសាលារៀនជំនាន់ថ្មី និងគម្រោងផ្សេងៗទៀតផងដែរ។ ការសហការរវាងអង្គការខេប ក្រុមហ៊ុនMeta និងនាយកដ្ឋានបច្ចេកវិទ្យាព័ត៌មាននៃក្រសួងអប់រំ យុវជន និងកីឡា ពិតជាបានរួមចំណែកយ៉ាងសំខាន់ក្នុងកំណែទម្រង់វិស័យអប់រំដើម្បីឆ្ពោះទៅរកការអប់រំបែបឌីជីថល។
ពិធីនេះបានប្រព្រឹត្តទៅមានគោលបំណង ដាក់ឱ្យប្រើប្រាស់ជាផ្លូវការឯកសារបណ្តុះបណ្តាលអក្ខរកម្មឌីជីថលខ្មែរនៅកម្ពុជា និងអត្ថប្រយោជន៍នៃឯកសារបណ្តុះបណ្តាលនេះសម្រាប់គ្រូ និងសិស្សនៅក្នុងសាលារៀនជំនាន់ថ្មី បង្កើនកិច្ចសហការល្អរវាងក្រហ៊ុន Meta ក្រសួងអប់រំ យុវជន និងកីឡា និងអង្គការ ខេប ដើម្បីធ្វើឱ្យប្រសើរឡើងនូវការសិក្សាបែបឌីជីថលក្នុងចំណោមសិស្សនៅក្នុងក្របខណ្ឌសាលារៀនជំនាន់ថ្មី ដែលជាការចូលរួមចំណែកដ៏សំខាន់មួយដល់ការអប់រំឌីជីថលនៅកម្ពុជា និងជំរុញការអភិវឌ្ឍជំនាញឌីជីថលនៅកម្រិតមធ្យមសិក្សាបឋមភូមិ និងមធ្យមសិក្សាទុតិយភូមិនាពេលអនាគត។ ពិធីនេះមានអ្នកចូលរួមប្រមាណជា ៥០នាក់ ដែលជាក្រុមការងារក្រសួងអប់រំ យុវជន និងកីឡា ក្រុមការងារបច្ចេកទេស នាយកសាលា និងគ្រូបង្គោលទាំង១២ តំណាងក្រុមហ៊ុន Meta និងក្រុមការងារអង្គការ ខេប៕
២៣ តុលា ២០២៣ | រាជធានីភ្នំពេញ
#MoEYS Cambodia #KAPE #NGS #Meta
Comments